ပဋိပက္ခမီးလျှံကြားက ဝင်ငွေရလမ်း

(အမုန်းစကားနှင့်ဝါဒဖြန့်ချိရေးများမှ ငွေကြေးအကျိုးအမြတ် ရရှိနေမှုများ)

Cashing_in_on_Chaos_My.pdf

Download PDF • 4.86MB

စစ်တပ်ထောက်ခံသော ဝါဒဖြန့်ချိရေးများက ငွေကြေးအကျိုးအမြတ်ဖြစ်လာသောအခါ လူမှုအကျိုးစီးပွားအပေါ် မည်မျှပင်ထိခိုက်နစ်နာစေကာမူ အကြောင်းအရာများထုတ်လုပ်ဖြန့်ချိနေထိုက်သည့် သဘောသက်ရောက်နေသည်။

၂၀၂၁ ခုနှစ် စစ်တပ်အာဏာသိမ်းမှုကြောင့်ဖြစ်ပေါ်လာသော နိုင်ငံရေးအရှုတ်အထွေးများနှင့်စိတ်ပိုင်းဆိုင်ရာထိခိုက်စေမှုများ သည် မြန်မာ့ဒစ်ဂျစ်တယ်ရပ်ဝန်းကို အလွန်အန္တရာယ်ရှိသော စစ်မြေပြင်တစ်ခုအသွင်သို့ တွန်းပို့စေခဲ့သည်။ ဒစ်ဂျစ်တယ်နယ်ပယ်၏စိုးရိမ်စရာကောင်းသော အခြေအနေများထဲကတစ်ခုမှာ စစ်တပ်ကိုထောက်ခံ၍ ဝါဒဖြန့်ချိရင်းကျော်ကြားလာသူ များက ဝါဒဖြန့်ချိရုံသာမက ယင်းတို့၏ဝင်ငွေရရှိရာလမ်းကြောင်းအဖြစ်ပါ လူမှုကွန်ရက်မီဒီယာများကိုအသုံးပြုလာခြင်းဖြစ် သည်။ ထိုသို့သောသူများအနက် ထင်ရှားကျော်ကြားသူတစ်ဦးမှာ စစ်တပ်ထောက်ခံဝါဒဖြန့်ချိသူ‘ဇော်ဘုန်းဟိန်’ဖြစ်ပြီး ဤဆောင်းပါးတွင် သူ့အား အဓိကဥပမာပေး၍ တင်ပြသွားပါမည်။

‌ဇော်ဘုန်းဟိန်းသည် စစ်တပ်ကျောထောက်နောက်ခံရှိသူအဖြစ် လူသိများထင်ရှားသူဖြစ်ပြီး အကြမ်းဖက်မှုများအား, အားပေးလှုံ့ဆော်သောအကြောင်းအရာများကို ရေးသားဖြန့်ချိခြင်းကြောင့် ဖေ့ဘွတ်ခ့်လူမှုကွန်ရက်က တားမြစ်ပိတ်ပင်ခြင်းခံထားရသူဖြစ်သည်။ ထိုသို့ပိတ်ပင်ခံထားရစဉ်ကတည်းက ယူကျူ့နှင့်တစ်တော့ခ့်ကို သူကပြောင်းလဲအသုံးပြုခဲ့ပြီး သွေးကွဲစေသောနှင့်အန္တရာယ်ရှိသော အာဘော်များအား ထုတ်လွှင့်ခဲ့သည်။ သူ၏ရုပ်သံထုတ်လွှင့်မှုအများစုတွင် တော်လှန်ရေးအင်အားစုများအ ခြေစိုက်သော သို့မဟုတ် အင်အားကောင်းသော ဒေသများကို စစ်တပ်က ပြင်းထန်စွာဖြင့် တိုက်ခိုက်ရန် တိုက်တွန်းထားသည်။ ထုတ်လွှင့်ချက်များသည် စစ်တပ်အား ထောက်ခံပြောဆိုသည်သာမဟုတ်ဘဲ တော်လှန်ရေးအင်အားစုများတည်ရှိရာနေရာများကို အတိအကျညွှန်းဆို၍ တိုက်ခိုက်စေပြီး အများပြည် သူ၏အသက်များကိုလည်း နစ်နာဆုံးရှုံးထိခိုက်စေသည်။

ပုံ (၁) ကြည့်ရှုသူတစ်သောင်းရှစ်ထောင်ကျော်ရှိသော အမျိုးသားရေးဝါဒီဇော်ဘုန်ဟိန်း၏ရုပ်သံတိုက်ရိုက်ထုတ်လွှင့်မှုနမူနာတစ်ခု

၂၀၂၅ ခုနှစ် မတ်လ(၁၉)ရက်နေ့၌ ထုတ်လွှင့်ချိန်(၁)နာရီ(၅၀)မိနစ်ကြာ တိုက်ရိုက်ထုတ်လွှင့်ခဲ့သော ရုပ်သံတွင် ယူကျူ့တိုက် ရိုက်ထုတ်လွှင့်မှုမှတစ်လလျှင် ကျပ်သိန်းတစ်ရာဝန်းကျင်(ကန်ဒေါ်လာ ၂၀၀၀)ခန့် ဝင်ငွေရရှိကြောင်း ဇော်ဘုန်းဟိန်က ပြောခဲ့ဖူးသည်။ အဆိုပါကိန်းဂဏန်းသည် စစ်တပ်နှင့်ဆက်စပ်သောသတင်းများ၊ ဝါဒဖြန့်ချိခြင်းများနှင့်အကြမ်းဖက်မှုအား လှုံဆော်အားပေးသောအကြောင်းအရာများကို ယူကျူ့မှထုတ်လွှင့်နေရင်းဖြင့် ဝင်ငွေပါရရှိနေကြောင်း အံ့ဩစရာကောင်းလောက်အောင် ပြသနေခြင်းဖြစ်သည်။ ဤကဲ့သို့ ဝင်ငွေရရှိနေခြင်းသည် ဇော်ဘုန်းဟိန်ကပြောနေသော အကြောင်းအရာများကို ယူကျူ့က ငွေကြေးအားဖြင့် ချီးမြှင့်ပေးနေသည့်အဓိပ္ပာယ်သက်ရောက်နေသည်။​ ယူကျူ့အယ်လ်ဂိုရစ်သမ်က သူ့ရုပ်သံများကို လူကြည့်များစေရန်လုပ်ဆောင်ပေးပြီး ယူကျူ့ဝင်ငွေရရှိစေမှုနည်းလမ်းများက ယင်းအား ငွေကြေးအကျိုးအမြတ်ရရှိစေခဲ့သည်။ ထိုသို့သောအခြေအနေများသည် ယူကျူ့ကို မေးခွန်းပေါင်းများစွာ မေးမြန်းရမည့်အခြေအနေဖြစ်လာစေသည်။ အမုန်းတရားနှင့်မဟုတ်မမှန်သည့် အချက်အလက်များက တန်ဖိုးရှိသောငွေကြေးတစ်ခုကဲ့သို့ဖြစ်လာသည့်အခါ ပလက်ဖောင်းများမှာ ကြားနေကြသည်ဟုပြောနေသော်လည်း ဖျက်ဆီးမှုများကနေ အကျိုးအမြတ်များရနေသလားဟု မေးခွန်းထုတ်ရမည့်အ ခြေအနေ ဖြစ်လာသည်။ 

ဝါဒဖြန့်ချိရေးသမားတို့အတွက် ဝါဒဖြန့်ချိရင်း ဝင်ငွေပါရနေစေသော ယူကျူ့

ပုံမှန်အားဖြင့် ယူကျူ့၏ငွေရှာဖွေမှုပုံစံသည် ဖန်တီးသူများက ယင်းတို့၏မူရင်းဖန်တီးမှု၊ ကြည့်ရှု့သူများနှင့်ထိတွေ့ဆက်ဆံမှု နှင့် ကြည့်ရှု့သူများဆက်လက်ကြည့်ရှု့နေအောင် ဆွဲဆောင်နိုင်မှုတို့အတွက် ဆုချရန် ရည်ရွယ်ထားခြင်းဖြစ်သည်။​ သို့သော် မြန်မာနိုင်ငံတွင် အဆိုပါပုံစံသည် နိုင်ငံရေးဝါဒဖြန့်ချိရေးအတွက် ကိရိယာတစ်ခုအဖြစ် မရည်ရွယ်ပါဘဲနှင့်ဖြစ်သွားစေခဲ့သည်။ ယူကျူ့၏အနောက်တိုင်းဘာသာစကား မဟုတ်သောထိန်းညှိရေးမူဝါဒ(moderation)နှင့်နောက်ခံအခြေအနေများအား နားမလည်ခြင်း(contexts) ဆိုင်ရာအားနည်းချက်များကြောင့် ဇော်ဘုန်းဟိန်ကဲ့သို့ စစ်တပ်ထောက်ခံဝါဒဖြန့်ချိသူများသည် စနစ်အ ပေါ်တွင် ခြယ်လှယ်ချင်တိုင်း ခြယ်လှယ်ခွင့်ရနေသည်။ ဇော်ဘုန်းဟိန်သည် စစ်တပ်၏အကျိုးစီးပွားနှင့် ကိုက်ညီသည့်“အမှန်တရား”၏ပြောရေးဆိုခွင့်ရှိသူအဖြစ် သူ့ကိုယ်သူနေရာယူပြီး စစ်တပ်၏ဇာတ်ကြောင်းများအပေါ် ထောက်ခံသူများ သို့မဟုတ် မတူကွဲပြားသည့်အမြင်များကို ထုတ်ဖော်ပြောဆိုရန် ကြောက်ရွံ့နေသည့် ကြည့်ရှု့သူအခိုင်အမာကို ပိုင်ဆိုင်သွားခဲ့သည်။ 

အထက်၌ တင်ပြခဲ့သော ၂၀၂၅ ခုနှစ် မတ်လ(၁၉)ရက်က ဇော်ဘုန်းဟိန်၏ဗီဒီယိုမှာပဲ သူက လှောင်ပြောင်၍ ပြစ်တင်ပြီး ပြော ဆိုရာတွင် “ငါ ဒီမှာ ထိုင်ပြီး လိုက်ဖ့်လွှင့်နေတယ်။ ဆဲဆိုနေတာတွေ၊ တားမြစ်တာတွေကို ငါမြင်နေရတယ်။ ဒါပေမဲ့ မင်းတို့သိထားဖို့က ဒီ(ယူကျူ့)ကနေ ငါပိုက်ဆံရနေတယ်ဆိုတာပဲ”ဟု ရုပ်သံတွင်ပြောဆိုခဲ့သည်။ သူ၏ပြောစကားများမှ ပေါ်လွင်နေသောအချက်မှာ သူရရှိသည့် မုန်းတီးမှုများသည် လူများ၏ထိတွေ့ဆက်ဆံမှုအားပိုဖြစ်စေပြီး အဆိုပါထိတွေ့ဆက်ဆံမှုများမှနေ၍အကျိုးအမြတ်ရရှိနေခြင်း ဖြစ်သည်။​

သူ၏တိုက်ရိုက်ထုတ်လွှင့်မှုများမှာ စစ်တပ်အား ချီးမွမ်းပြောဆိုမှုများနှင့် စစ်တပ်အား ဆန့်ကျင့်သူများကို စော်ကားပြောဆိုမှုများဖြင့် ပြည့်နှက်နေတတ်သည်။ သူ့ထုတ်လွှင့်ချက်အား ကြည့်ရှုသူများက အပြန်အလှန်မှတ်ချက်ပေးပြောဆိုကြသကဲ့သို့ လ စဉ်ကြေးပေးဝင်ခြင်းနှင့်ပြသလာသမျှ ‌ကြော်ငြာများ အားလုံးကြည့်ရှုပေးခြင်းဖြင့် သူ့ကိုဝင်ငွေရရှိနေစေသည်။ ဇော်ဘုန်းဟိန်ဆီသို့ ငွေကြေးအကျိုးအမြတ်များ တသွင်သွင်စီးဆင်းနေပြီး လူ့အဖွဲ့အစည်းအပေါ် အန္တရာယ်ရှိစေသော အကြောင်းအရာများကို ပံ့ပိုးထောက်ပံ့စေသည်။ ထို့ကြောင့် အမုန်းနှင့်ဝါဒဖြန့်ချိခြင်းများသည် အကျိုးအမြတ်ရစေရာအဖြစ် ပြောင်းလဲသွားသည်။

ထို့နည်းအတူ စစ်တပ်ထောက်ခံဝါဒဖြန့်သူတစ်ဦးဖြစ်သည့် မြန်မာ့ဂုဏ်ဂျာနယ်မှ အောင်မိုးကျော်ကလည်း သူ၏ယူကျူ့ချန်နယ်အား ရယူကြည့်ရှုသူ ကိုးသောင်းရှိနေပြီဟု တယ်လီဂရမ်ချန်နယ်မှာ ထုတ်လွှင့်လေ့ရှိသော ဗီဒီယိုထဲတွင် ၂၀၂၅ ခုနှစ် မတ်လ(၃)ရက်နေ့က ပြောခဲ့သည်။ ရယူကြည့်ရှုသူတစ်သိန်းရအောင် ကြိုးစားမည်ဟုလည်း သူကထည့်ပြောခဲ့သည်။ ထို့အတူ ၂၀၂၅ ခုနှစ် ဇန်နဝါရီလ(၆)ရက်မှလည်း သူ့ယူကျူ့ချန်နယ်ကို ရယူထားရန်(subscribe လုပ်ထားရန်)ထပ်မံပြောဆိုပြီး ရယူကြည့်ရူသူ တစ်သိန်းပြည့်ပါက ယူကျူ့၏အသိအမှတ်ပြုတံဆိပ်အား သူ့အနေဖြင့် လက်ခံရရှိမည်ဖြစ်ကြောင်း ပြောသည်။

ပုံ(၂) စစ်တပ်ထောက်ခံသူ အောင်မိုးကျော်က သူ့ယူကျူ့ ချန်နယ်ကို ရယူထားရန်တိုက်တွန်းခဲ့ပြီး

ရယူကြည့်ရူသူ တစ်သိန်းပြည့်ပါက ယူကျူ့၏အသိအမှတ်ပြုတံဆိပ်ရမည်ဖြစ်ကြောင်း ပြောခဲ့သည်။

ပုံ(၃) စစ်တပ်ထောက်ခံဝါဒဖြန့်သူ ကိုသက်ကလည်း

အောင်မိုးကျော်၏ တယ်လီဂရမ်ပို့စ်ကို ထပ်ဆင့်မျှ ဝေပေးခဲ့သည်။

မြန်မာ့ဝါဒဖြန့်ချိရေးယန္တရားကို မီးစာထိုး၍ အကျိုးအမြတ်ရနေသောယူကျူ့နှင့်ကျင့်ဝတ်

အမျိုးသားရေးဝါဒီအကြောင်းအရာများကို အင်တာနက်ပေါ်က အသံဆူညံမှုတစ်ခုဟု သာမန်သဘောထားလိုက်ရန် လွယ်ကူပေမယ့်လည်း၊ တကယ့်လက်တွေ့ဘဝမှာတော့ အကျိုးဆက်များက အလွန်ကြီးမားပြီး အန္တရာယ်လည်းများသည်။ စစ်တပ်လို လားသည့် အကြောင်းအရာများကတစ်ဆင့် ငွေကြေးရရှိနေခြင်းသည် ဇော်ဘုန်းဟိန်းနှင့်အောင်မိုးကျော်တို့ကဲ့သို့ လူများကို ငွေကြေးကြွယ်ဝစေရုံတင်မကဘဲ မုန်းတီးမှု၊ မှားယွင်းသည့်အချက်အလက်နှင့်အကြမ်းဖက်မှုများပါဝင်သော ပိုမိုကျယ်ပြန့် သည့်ဂေဟစနစ်ကြီးတစ်ခုလုံးအားတရားဝင်ဖြစ်စေပြီး အသက်ဆက်ရှင်သန်နေစေသည်။ ထို့အပြင် ကြည့်ရှုသူများကို ရက် စက်ကြမ်းကြုတ်မှုများအပေါ် ထုံပေပေဖြစ်လာစေပြီး ဒီမိုကရေစီ၏စံနှုန်းများကိုလည်း ထိခိုက်စေသကဲ့သို့ မတူကွဲလွဲသည့်အသံများကိုပါ နှုတ်ပိတ်တိတ်ဆိတ်စေသည်။

ဤကဲ့သို့ ဖန်တီးသူများကို ငွေကြေးအားဖြင့် အကျိုးအမြတ်တွေပေးနေခြင်းအားဖြင့် ယူကျူ့ကဲ့သို့ ပလက်ဖောင်းများသည် သွယ်ဝိုက်၍ရာဇဝတ်မှုများတွင် ပူးပေါင်းပါဝင်နေသည်။ ယူကျူ့၏ပြောကြားချက်အရ အကြောင်းအရာများကို သူတို့၏မူဝါဒများနှင့်ကိုက်ညီမှုရှိမရှိ စစ်ဆေးရန်အတွက် အလိုအလျောက်စနစ်နှင့်လူသားစိစစ်သူများဖြင့်ပေါင်းစပ်၍ ပြန်လည်သုံးသပ်သည်ဟု ဆိုပါသည်။ YouTube Partner Program (YPP)က တစ်နှစ်အတွင်းမှာ subscriber ၁,၀၀၀ နှင့် ကြည့်ရှုချိန်နာရီ ၄,၀၀၀ ပြည့်သည့်ဖန်တီးသူများကို ငွေရှာခွင့်ပေးပါသည်။ အဆိုပါ လိုအပ်ချက်များသည် လူကြိုက်များမှုနှင့်ထိတွေ့ ဆက်ဆံမှုကို တိုင်းတာနိုင်သော်လည်း ကိုယ်ကျင့်တရားဆိုင်ရာအကျိုးဆက်များ သို့မဟုတ်  ပြင်ပမြေပြင်အခြေအနေမှာ ဖြစ် လာနိုင်သည့် ထိခိုက်မှုများအား ထည့်သွင်းစဉ်းစားထားခြင်း မရှိပါ။ စစ်တပ်ထောက်ခံသူများ၏ဝါဒဖြန့်ချိသည့်အကြောင်းအ ရာများကို ယူကျူ့က လက်သင့်ခံ အားပေးထောက်ခံမှု မရှိပါဘူးဟု ငြင်းချက်ထုတ်နိုင်သော်လည်း ငွေကြေးဆိုသော သက် ရောက်မှုက အင်အားကြီးမားလှသည်။ စစ်တပ်ထောက်ခံသော ဝါဒဖြန့်ချိရေးများက ငွေကြေးအကျိုးအမြတ်ဖြစ်လာသော အခါ လူမှုအကျိုးစီးပွားအပေါ် မည်မျှပင်ထိခိုက်နစ်နာစေကာမူ အကြောင်းအရာများထုတ်လုပ်ဖြန့်ချိနေထိုက်သည့် သဘောသက်ရောက်နေသည်။

ထိုအကြောင်းများသည် စကားအလင်္ကာသက်သက်ဖြင့် ထောက်ခံပြောဆိုနေခြင်း မဟုတ်ပါ။ ၂၀၂၅ ခုနှစ် ဧပြီလ(၁၅)ရက်က ဇော်ဘုန်းဟိန်ထုတ်လွှင့်ခဲ့သောရုပ်သံ၏ မိနစ်(၄၀)ဝန်းကျင်၌ ပြောဆိုချက်အရ စစ်တပ်အား ကာကွယ်ပြောဆိုနေခြင်းသာမ က တော်လှန်ရေးအင်အားစုများ၏အချက်အလက်များကို စစ်တပ်သို့ပေး၍ ဖမ်းဆီးခိုင်းနိုင်သည်အထိ လုပ်ဆောင်နိုင်ကြောင်း သိရသည်။ အန္တရာယ်ရှိစေသောအခြေအနေတစ်ရပ်သို့ ရွေ့နေကြောင်း ထိုအချက်က ပြသနေသည်။ ယူကျူ့မှငွေကြေးအ ကျိုးအမြတ် တစ်စုံတရာရရှိနေရုံသာမက မြေပြင်အကြမ်းဖက်မှုများဖြစ်စေရန် အင်အားဖြည့်ပေးသကဲ့သို့ဖြစ်စေသည်။

တချိန်ထဲမှာပင် စစ်တပ်နှင့်ဆက်စပ်နေသော NP News မှ စစ်တပ်ဝါဒဖြန့်သူ ကျော်မျိုးမင်းကလည်း တစ်ခြားသူများက သူ၏ရုပ်သံများကို ကူးယူ၍ ချန်နယ်ပေါင်းများစွာက ပြန်လည်လွှင့်တင်နေကြောင်း၊ သူ၏ရုပ်သံကို လွှင့်တင်ပါက ငွေကြေးအ ကျိုးအမြတ်ရမည်မှန်းသိကြ၍ဖြစ်ကြောင်း ဖော်ပြခဲ့သည်။ ထိုအချင်းအရာများသည် ဝါဒဖြန့်ချိရေးမှ ငွေကြေးအကျိုးအမြတ်ရသော အမုန်းတရားဂေဟ လှည့်ပတ်ခြင်းသို့ ကူးပြောင်းသွားသည်။  ဒီစနစ်မှာ ဝါဒဖြန့်ချိမှုများကို အဆုံးမရှိ ကူးယူ၊ ငွေရှာပြီး ပိုမိုကျယ်ပြန့် အောင်လုပ်ဆောင်ကာ ထိခိုက်နစ်နာမှုသံသရာကို အမြဲရှင်သန်နေစေခဲ့သည်။

ထိုအခြေအနေများမှ မည်သို့ဆက်လက် လုပ်ဆောင်ကြမည်နည်း။

လူမှုကွန်ရက်မီဒီယာများမှ ငွေကြေးအကျိုးအမြတ်ရရှိမှုစနစ်က အမုန်းစကားနှင့်ဝါဒဖြန့်ချိရေးများအား အထောက်အပံ့ဖြစ်နေမှုကို ဖြေရှင်းရန်အတွက် နိုင်ငံတကာအဖွဲ့အစည်းများ (အစိုးရမဟုတ်သောအဖွဲ့အစည်းများနှင့်အရပ်ဘက်အဖွဲ့အစည်းများအပါအဝင်)၊ ကြီးကြပ်ရေးအဖွဲ့များ၊ နည်းပညာလုပ်ငန်းများနှင့်ကြော်ငြာရှင်များသည် ယင်းအခြေအနေများကိုသဘော ပေါက်၍ သိနားလည်နေသည်သာမက တားဆီးနိုင်ရန်အတွက် လက်တွေ့အရေးယူမှုများနှင့်ထိရောက်သောဆောင်ရွက်မှုများကို အစောတလျင်လုပ်ဆောင်ရန် လိုအပ်သည်။​ ယင်းတို့အတွက် အောက်ပါအတိုင်း အကြံပြုလိုပါသည်။

၁။ ဒေသအခြေပြုအကြောင်းအရာအပေါ် ထိန်းကြောင်းခြင်းဖြင့် ထိရောက်သော အကောင်အထည်ဖော်မှုကို ဆောင်ရွက်ပါ။ ယူကျူ့အပါအဝင် အခြားသောလူမှုကွန်ရက်မီဒီယာများသည် ဒေသတွင်းအခြေအနေများကို ထင်ဟပ်နေသော အကြောင်းအရာများကို အလေးထား၍ ညှိနှိုင်းထိန်းကြောင်းသင့်သည်။ မြန်မာနိုင်ငံ၏ယဉ် ကျေးမှုနှင့်နိုင်ငံရေးအကြားက သိမ်မွေ့နက်နဲလွန်းသောအခြေအနေများကို နားလည်ရန်လိုအပ်သည်။

၂။ ထိခိုက်နစ်နာစေသောအကြောင်းအရာများကို ငွေကြေးအကျိုးအမြတ်များပေးခြင်း ဖြတ်တောက်ပါ။ အကြမ်း ဖက်မှုအား လှုံ့ဆော်သော၊ အမုန်းစကားများနှင့်အန္တရာယ်ရှိသောသတင်းမှားများဖြစ်သော အကြောင်းအရာများအတွက် ငွေကြေးအကျိုးအမြတ်ရရှိနေခြင်းကို ရပ်တန့်စေရမည်။ လူမှုကွန်ရက်အသိုင်းအဝိုင်းစည်းမျဉ်းအား ချိုးဖောက်ကြသူများ၊ အကြိမ်ကြိမ်ချိုးဖောက်နေကြသူများနှင့်အကြောင်းအရာများအား ထပ်ဆင့်ပြန်လည်မျှဝေနေမှုများကို ပိုမိုတင်းကြပ်၍ မြန်ဆန်စွာအရေးယူနိုင်ရန်ဟုလည်း ဆိုလိုပါသည်။

၃။ ငွေကြေးအကျိုးအမြတ်ရခြင်းမူဝါဒအပေါ်  ပွင့်လင်းမြင်သာမှုမြှင့်တင်ပါ။ လူမှုကွန်ရက်မီဒီယာများအနေဖြင့် မည်သည့်အကြောင်းအရာများကို ငွေကြေးရရှိခွင့်တိုးမြှင့်ပေးမည်။ မည်သည့်အကြောင်းအရာများအပေါ် ငွေ ကြေးအကျိုးအမြတ်ခွင့်ပြုမည် စသည်တို့ကို ပိုမိုရှင်းလင်းစွာဖော်ပြရမည်။ မြန်မာနိုင်ငံကဲ့သို့ နိုင်ငံရေးအပြောင်း အလဲများ၍ ပဋိပက္ခမြင့်မားသောနေရာများအတွက် ငွေကြေးအကျိုးအမြတ်ရခြင်းမူဝါဒကို ပိုမိုသေချာစွာ ဆောင်ရွက်သင့်သည်။

၄။ ကျင့်ဝတ်နှင့်ညီသော ကြော်ငြာနေရာနှင့်လုံခြုံသောအမှတ်တံဆိပ်များဖြစ်စေရန် ကြော်ငြာရှင်များက တာဝန်ယူပါ။ မိမိတို့၏လုပ်ငန်းကြော်ငြာများ ကြော်ငြာရာနေရာများကို ကြော်ငြာရှင်များက တာဝန်ယူရန်လိုအပ်သည်။ ထိခိုက်နစ်နာမူရှိစေသော အကြောင်းအရာများ၊ အကြမ်းဖက်မှုလှုံဆော်စေမှုများနှင့် သတင်းမှားများကို လှုံ့ဆောင်သောချန်နယ်များသို့ ငွေကြေးပေးကမ်းမိခြင်း သို့မဟုတ် တရားဝင်မှုရစေရန် ထောက်ပံ့ပေးစေမှုများ မဖြစ်သင့်ပါ။ ယင်းအတွက် ကြော်ငြာလွှင့်တင်သောနေရာများ သို့မဟုတ် ပါဝင်နေသော နေရာများအတွက် လူမှုကွန်ရက်မီဒီယာများထံမှ ပိုမိုတိကျသောအချက်အလက်များကို တောင်းဆိုခြင်း၊ အမှတ်တံဆိပ်လုံခြုံမှုအတွက် စိတ်ချရသောကိရိယာများအသုံးပြုခြင်းနှင့် ထိလွယ်ရှလွယ်သော ဝန်းကျင်များအတွက်  ကြော်ငြာအသုံးစရိတ်ချ မှတ်ရာတွင် ခိုင်လုံသေချာသော ကျင့်ဝတ်ညွှန်းဆိုချက်များပါဝင်ခြင်း စသည်တို့ ပါဝင်သည်။

Recommended Citation Style - Myanmar Internet Project (2025, Aug 18)၊

ပဋိပက္ခမီးလျှံကြားက ဝင်ငွေရလမ်း(အမုန်းစ ကားနှင့်ဝါဒဖြန့်ချိရေးများမှ ငွေကြေးအကျိုးအမြတ်ရရှိနေမှုများ)၊ https://www.myanmarinternet.info/my/post/cashing_in_on_chaos_my